A atención ás persoas con demencia ou alzhéimer require proximidade, continuidade e recursos adaptados á realidade de cada territorio. Por iso, grazas á colaboración da Fundación Antonio Moreno, AGADEA continúa reforzando en 2026 a súa presenza no rural galego, levando programas de estimulación terapéutica a aquelas zonas nas que o acceso a servizos especializados resulta máis complicado.
Esta iniciativa permite ofrecer actividades orientadas a manter e potenciar as capacidades cognitivas, físicas e sociais das persoas participantes, favorecendo ao mesmo tempo a súa autonomía e benestar emocional. Os talleres están deseñados para adaptarse ás características de cada grupo e convértense tamén en espazos de convivencia, intercambio e apoio mutuo.
Ademais do traballo directo coas persoas usuarias, o proxecto ten un impacto moi relevante nas familias e persoas coidadoras, que atopan acompañamento e recursos preto dos seus fogares, evitando desprazamentos e facilitando a conciliación dos coidados coa vida diaria.
Desde AGADEA defendemos que todas as persoas teñen dereito a acceder a unha atención especializada con independencia do lugar onde vivan. Por iso, seguimos traballando para construír unha Galicia máis inclusiva, na que o rural sexa tamén un espazo de oportunidades, participación e calidade de vida.
Queremos agradecer á Fundación Antonio Moreno o seu apoio e confianza, que nos permite seguir avanzando neste camiño e achegar coidados profesionais, humanidade e esperanza a cada vez máis persoas e familias do rural galego.
