O Centro de Día de Ribeira, xestionado por AGADEA Alzhéimer, recibiu esta mañá a visita da conselleira do Mar, Marta Villaverde, acompañada por Rosa Carballo, representante do Grupo de Acción Local do Sector Pesqueiro (GALP).
Durante o encontro, ambas representantes institucionais puideron coñecer de primeira man o labor que se desenvolve neste centro, dirixido a mellorar a calidade de vida das persoas con alzhéimer e outras demencias, así como a ofrecer apoio ás súas familias. A visita incluíu un percorrido polas instalacións, a participación en actividades de estimulación e memoria e un espazo de diálogo co equipo profesional.
A presidenta de AGADEA, Isabel Gey, destacou que “para nós é fundamental contar co respaldo das institucións, que nos axuda a seguir medrando e a innovar en modelos de atención sostibles, humanos e próximos. A visita da conselleira e de Rosa Carballo supón un recoñecemento ao esforzo diario do noso equipo e das familias que confían en nós”.
Nun xesto cheo de simbolismo, as persoas usuarias fixeron entrega de pequenos agasallos tanto á conselleira como á representante do GALP, amosando así o seu agradecemento e afecto.
O Centro de Día de Ribeira forma parte da rede de recursos de AGADEA Alzhéimer, entidade que leva máis de 30 anos traballando en Galicia pola atención ás persoas con demencia e as súas familias, promovendo ao mesmo tempo accións de sensibilización social arredor do alzhéimer.
