O mércores 20 de agosto tivo lugar a entrega de chaves e sinatura de convenio entre AGADEA ALZHÉIMER e o Concello de Boiro para a cesión dun dos inmobles das antigas vivendas de mestres de Praia Xardín, que se transformarán nun espazo de innovación na atención sociosanitaria co proxecto AGADEA HABITAT.
O centro, con formato híbrido, contará con 26 prazas de centro de día para persoas maiores e persoas con demencias, así como 6 unidades convivenciais temporais con 18 prazas en apartamentos asistidos. Estas instalacións ofrecerán programas de respiro familiar, coidados intermedios e actividades interxeracionais abertas á comunidade. Un proxecto adaptado ao hábitat de Boiro, enraizado nun territorio sempre ligado ao mar, á pesca, ao marisqueo e á vida comunitaria.
Na presentación, o alcalde de Boiro, José Ramón Romero, destacou “o valor de recuperar un espazo público e dotalo dunha nova vida con utilidade social, nun proxecto que mira ao mar e á comunidade”. Pola súa parte, o concelleiro de Servizos Sociais, Raúl Treus, puxo en valor “a importancia de sumar recursos e atención especializada para as familias do Barbanza”.
A presidenta de AGADEA, María Isabel Gey, sinalou que “este proxecto representa unha nova maneira de coidar: un espazo de convivencia para a veciñanza de Boiro e a comarca do Barbanza, dignifican e integran ás persoas maiores e con demencia, ofrecendo tamén apoio real ás familias e coidadores”.
AGADEA HÁBITAT contará coa financiación da Consellería do Mar a través do GALP Ría de Arousa, no marco do Fondo Europeo Marítimo, de Pesca e de Acuicultura 2021-2027
A apertura do centro está prevista para o verán de 2026, coa vontade de converterse nun referente en innovación social e atención ás persoas maiores na comarca do Barbanza.
